Zemljotres kod Sinja probudio građane i turiste na Jadranu
Zemljotres kod Sinja, jačine 3,5 stepeni po Rihteru, zabilježen je oko sat vremena nakon ponoći na Jadranu, na području Sinja u Hrvatskoj. Potres su osjetili brojni građani i turisti, od kojih su mnogi iskočili iz kreveta.
Zemljotres na dubini od nula kilometara
Prema podacima platforme EMSC, zemljotres je registrovan na dubini od 0 kilometara, na devet kilometara sjeverno od grada. Na ovoj platformi nakon potresa zabilježeno je više od 400 komentara građana koji su opisali svoja iskustva.
Reakcije građana i turista
„Jak udarac i podrhtavanje”, „Dobro je zatreslo”, „Tutnja kao da je kamion, čula sam i razbijanje čaša u stanu iznad kod komšija”, samo su neki od komentara. Jedan korisnik iz Senja naveo je da se prvo osjetio mali tremor, a zatim malo jači udar koji je trajao oko pet sekundi.
„Osjetio sam iznenadni udar u krevetu, a onda je uslijedila neka kao eksplozija, jako bum, cijela kuća se zatresla. Nema štete”, napisao je jedan od svjedoka na engleskom jeziku. Jedna Mađarica navela je da su se stakla zatresla kao kada blizu udari grom i da se odmah probudila.
U ovom trenutku nema informacija o eventualnoj materijalnoj šteti.
